জননী লাইভ

গোলাঘাট পৌৰ সভালৈ স্বচ্ছ সৰ্বেক্ষণ -২০২১ বঁটা 

২০নৱেম্বৰত নতুন দিল্লীত ৰাষ্ট্ৰপতিয়ে প্ৰদান কৰিব বঁটা

ডিজিটেল সংবাদ, গোলাঘাটঃ কেন্দ্ৰীয় চৰকাৰৰ গৃহ নিৰ্মাণ আৰু নগৰ পৰিক্ৰমা মন্ত্ৰালয়ে স্বচ্ছতাৰ ক্ষেত্ৰত প্ৰদৰ্শন কৰা পাৰদৰ্শিতাৰ ভিত্তিত অসমৰ নখন পৌৰ সভালৈ ২০২১ চনৰ স্বচ্ছ সৰ্বেক্ষণ বঁটা আগবঢ়াইছে । গোলাঘাট পৌৰসভায়ো এইবছৰৰ স্বচ্ছ সৰ্বেক্ষণ বঁটা লাভ কৰিছে । অহা ২০ নৱেম্বৰত নতুন দিল্লীৰ বিজ্ঞান ভৱনত স্বচ্ছ অমৃত মহোৎসৱ শীৰ্ষক এটা বঁটা প্ৰদান অনুষ্ঠানত এই বঁটাসমূহ আনুষ্ঠানিকভাৱে প্ৰদান কৰা হ'ব । ৰাষ্ট্ৰপতি ৰামনাথ কোবিন্দে সেইদিনা আন আঠখন পৌৰসভাৰ উপৰি গোলাঘাট পৌৰ সভাক এই বঁটা প্ৰদান কৰিব । গোলাঘাট জিলাৰ উপায়ুক্ত মৃগেশ নাৰায়ণ বৰুৱা, গোলাঘাট পৌৰসভাৰ কাৰ্যবাহী বিষয়া ডঃ সংগীতা বৰঠাকুৰ আৰু পৌৰসভাৰ বিষয়া-কৰ্মচাৰীসকলে এই সাফল্যত সন্তুষ্টি প্ৰকাশ কৰাৰ লগতে গোলাঘাট নগৰখনক পৰিষ্কাৰ কৰি ৰখাৰ ক্ষেত্ৰত আগবঢ়োৱা সহযোগিতাৰ বাবে জনসাধাৰণক ধন্যবাদ কৰিছে ।