ডিজিটেল গ্ৰন্থ, ডিজিটেল সংবাদপত্ৰ আৰু ডিজিটেল লাইব্ৰেৰিৰ উন্মোচন
ডিজিটেল ডেস্কঃ বুধবাৰে সন্ধিয়া ৭ বজাত, ত্ৰাতৃ এপৰ প্ৰতিষ্ঠাপক ত্ৰিদীপ বৰুৱাৰ উদ্যোগত এখন ডিজিটেল গ্ৰন্থ আৰু এটা ডিজিটেল লাইব্ৰেৰিৰ উন্মোচনী অনুষ্ঠানটো গুগল মিটৰ জৰিয়তে হোৱা এক আটক ধুনীয়া অনুষ্ঠানত সফলতাৰে সম্পূৰ্ণ কৰা হয়। ডিজিটেল শিক্ষাৰ সম্প্ৰসাৰণ আৰু জ্ঞানৰ সহজলভ্যৰ দিশত এক অতি গুৰুত্বপূৰ্ণ পদক্ষেপ হিচাপে বিবেচিত হয় এই অনুষ্ঠানটো। উন্মোচনী অনুষ্ঠানটো দুটা পৰ্যায়ত সম্পন্ন কৰা হৈছিল। প্ৰথমটো পৰ্যায়ত ডিজিটেল গ্ৰন্থখনৰ উন্মোচনৰ কাৰ্য্য সম্পূৰ্ণ কৰা হৈছিল। অসমৰ বিশিষ্ট লেখক তথা অসম সাহিত্য সভাৰ সভাপতি ড° বসন্ত কুমাৰ গোস্বামীৰ তত্বগধূৰ গ্ৰন্থ “সত্ৰানুষ্ঠানৰ ইতিবৃত্ত” নামৰ ডিজিটেল গ্ৰন্থখন উন্মোচন কৰে প্ৰাগজ্যোতিষপুৰ বিশ্ববিদ্যালয়ৰ উপাচাৰ্য আৰু বিষ্ণুপ্ৰিয়া সাহিত্য সভাৰ সন্মানীয় সভাপতি ড° স্মৃতি কুমাৰ সিনহাই। সভাৰ মুখ্য অতিথিৰূপে আসন গ্ৰহন কৰি প্ৰাগজ্যোতিষপুৰ বিশ্ববিদ্যালয়ৰ উপাচাৰ্য ড০ স্মৃতি কুমাৰ সিনহাই সত্ৰ আৰু আৰু অসমৰ সংস্কৃতিৰ ওপৰত লিখা গ্ৰন্থখন কিমান মূল্যৱান আৰু গ্ৰন্থখনৰ প্ৰয়োজনীয়তাৰ বিষয়ে এক সাৰুৱা মন্তব্য দাঙি ধৰিলে লগতে ত্ৰাতৃ এপৰ উদ্ভাৱক ত্ৰিদীপ বৰুৱাক ধন্যবাদ জনাই আজিৰ যুগত সাহিত্য প্ৰসাৰ তথা প্ৰচাৰৰ ক্ষেত্ৰত ডিজিটেল মাধ্যমৰ উপকাৰিতাৰ বিষয়ে সকলোকে সজাগ কৰে। অনুষ্ঠানত দিয়া ভাষণত তেওঁ কয় যে ডিজিটেল মাধ্যম বৰ্তমান যুগত জ্ঞান আহৰণৰ এক শক্তিশালী মাধ্যম আৰু ই সকলো শ্ৰেণীৰ লোকৰ বাবে উপকাৰী হ’ব। বসন্ত কুমাৰ গোস্বামীয়ে তেখেতৰ ভাষণত উপস্থিত সকলোকে ধন্যবাদ জ্ঞাপন কৰে আৰু ডিজিটেল মাধ্যমৰ আৱশ্যকতাৰ বিষয়ে আৰু অসম সাহিত্য সভাই বৰ্তমান কৰি থকা কিছু গুৰুত্বপূৰ্ণ কাৰ্যৰ বিষয়ে অবগত কৰায়। সুলেখিকা মালবিকা শৰ্মাই অনুষ্ঠানটো পৰিচালনা কৰে। তেখেতে ত্ৰাতৃ এপত থকা তেখেতৰ ব্যক্তিগত ডিজিটেল লাইব্ৰেৰি “Malabikaz Library” ত এই গ্ৰন্থখন উপলব্ধ হ’ব বুলি সভাত উপস্থিত থকা সকলোকে অৱগত কৰে। শিক্ষা, সাহিত্য, আৰু প্ৰযুক্তি আৰু গণমাধ্যমৰ বহু প্ৰতিষ্ঠিত আৰু সন্মানীয় ব্যক্তিয়ে এই অনুষ্ঠানত অংশগ্ৰহণ কৰে। সকলো বিশিষ্ট ব্যক্তিৰ উপস্থিতিয়ে অনুষ্ঠানটোক এক বিশেষ মৰ্য্যাদা প্ৰদান কৰে।
সভাত অতিথিৰূপে উপস্থিত থকা গহপুৰৰ ছয়দুৱাৰ মহাবিদ্যালয়ৰ অধ্যক্ষ ড০ কিশোৰ সিং ৰাজপুতে তেওঁলোকৰ মহাবিদ্যালয়ত ত্ৰাতৃ এপৰ উদ্যোগত তথা দিশান্ত ডেকাৰ সম্পাদনাত প্ৰথমখন ডিজিটেল সংবাদপত্ৰ “ছয়দুৱাৰ কন্ঠ”প্ৰকাশ পোৱাৰ কথা উল্লেখ কৰে। দ্বিতীয়টো পৰ্যায়ত সুলেখিকা মঞ্জু দত্ত দেৱীৰ ডিজিটেল লাইব্ৰেৰিটোৰ শুভ উন্মোচন কৰা হয়। মঞ্জু দত্ত দেৱীৰ ডিজিটেল লাইব্ৰেৰিটো উন্মোচন কৰে বসন্ত কুমাৰ গোস্বামীয়ে।
ডিজিটেল গ্ৰন্থ তথা লাইব্ৰেৰিৰ এই ভাৰ্চুৱেল উন্মোচনী অনুষ্ঠানটো আছিল এক সফল আৰু উল্লেখযোগ্য অনুষ্ঠান। প্ৰযুক্তিৰ জৰিয়তে ভৌগোলিক দূৰত্ব অতিক্ৰম কৰি সকলোৱে একত্ৰিত হৈ শিক্ষা আৰু জ্ঞানৰ এক নতুন অধ্যায় আৰম্ভ কৰিলে। বিশিষ্ট অতিথিসকলৰ উপস্থিতিয়ে অনুষ্ঠানটোক অধিক মৰ্যাদাপূৰ্ণ কৰি তুলিছিল। এই ডিজিটেল মাধ্যমে ভৱিষ্যতে জ্ঞানৰ পোহৰেৰে বহু লোকক আলোকিত কৰিব বুলি আশা কৰা হৈছে।
No comments